Die neusten Geschichten aus Bern West auf Mundart

5 Minuten zu lesen
Julia Degelo am bärndütschen Aabe im Quartierzäntrum Mäderguet. Foto: Marc de Roche

O hüt wei mer wider e chly i üser Mundart ploudere. Hie zwo Gschichte vo Lüt, wo usem Weschte vo Bärn stamme u när usgwanderet sy, nid wyt – der Bruno isch bis Münchebuchsi cho, d Julia immerhin bis Winterthur.

Wär schrybt üs öppis übere Früelig? Oder über öppis Nöis im Weschte vo Bärn? Mir fröien üs uf öii Gedanke: Üsi Adrässe: redaktion@bümplizwoche.ch

Julia Degelo: E Bärnere z Züri

D Lüt vo Züri si gar nid schneuer!

I chumen us Bärn u bi z Bümpliz u z Hingerchappele ufgwachse. Jitze wohnen i z Winterthur im Kanton Züri. Das sorgt meischtens für heftegi Reaktione, wen is verzeue. D Bärnerinne u d Bärner hei ja sehr dezidierti Meinige über «d Zürcher»: Entweder finge si der Dialäkt wüescht, d Lüt vo Züri unsympathisch u hektisch oder d Stadt mega mondän, gross u chic.

I wohne sit knapp vier Jahr dert u was i bis jitz cha säge: D Zürcher u d Zürcherinne si nid schneuer aus ig. Di meischte finge Bärndütsch u härzig. I ha auso meischtens scho gwunne, weni nume ds Muu ufmache. Bärndütsch isch aber offebar o schwirig z verstah: «gränne, äuä oder ömu» mues i immer erkläre.

Aber i ha on es paar schöni züridütschi Wörter glehrt. E Fründin vo mir seit immer, we sin es Bébé gseht oder e chlyne Hung: «Das isch aber en süesse Bolle!» Bolle isch öppis Runds, e Baue oder so, aber meh härzig. U das isch doch würklech es Super-biud: Öppis isch so süess, dass mes aus rund, chly u weich bezeichnet. Wes uf Bärndütsch nid so komisch würd töne, würd is grad übernäh. Julia Degelo

Gueti Musig syt 1958 

Uf em Platz näb em Stärne

Aus ehemalige Bümplizer – dert ufgwachse u i d Schueu ggange – spazieren i öppedie mau dür ds Dorfzäntrum. Uf em Platz näb em Stärne touchen Erinnerigen uuf: Es isch im Summer 1959 gsi, wo di im Früelig 1958 nöi ggründeti Knabemusig Bümpliz (hüt Jugendmusig Bümpliz) dert ihres erschte Platzkonzärt het gä. Ig aus zähjährige Gieu mit em Flügu-horn (uf em aute Föteli zusserscht linggs i der zwöite Reie) u my Vatter aus Dirigänt vorne dra. D Lüt sy dicht drängt rund ume gstange u hei gspannt glost, was di Tschuppele Giele us irne aute Insrumänt use bringe. Ja, «Giele» han i gschrybe. Modi hets dennzumau no keni gä in ere Knabemusig! Wo du d Tochter vom Klarinette-Instrukter ou i d Knabemusig het wöue, isch d Diskussion losgange, ob me jitz wöui Meitschi ufnä oder nid. Item, der Wäg zur Namesänderig isch du ömu non e lengere worde… 

Zum füfzg-Jahr-Jubiläum im 2008, wi o zum Bischpiu im Jahr 2020, hei am genau glyche Standort ähnlechi Platzkonzärt stattgfunge, vor de genau glyche aute Geböid, wi me uf de Föteli cha gseh. Der Metzger isch haut hüt eifach nümm dert, u statt em Velo- u Töff-Lade gits jitz ds Coop. D Musigstück sy äuä ou nümm ganz di glyche wi damaus, ou das änderet haut mit der Zyt. Schön, dass es aber immer no viu jungi Lüt git, wo ds Musigmache pflege.

Ig wünsche der Jugendmusig Bärn-Bümpliz wyterhin aus Guete! Bruno Chapuis,

Weitere Artikel in der Kategorie Bern West

Weihnachtspost aus Bethlehem

Es ist wieder soweit: die Weihnachtsfiliale in Bethlehem öffnet ihre Tore. Dort stempeln Postangestellte die Weihnachtspost…