Schaluus: Es Wort, wo me hütt nümm viu ghört

4 Minuten zu lesen
Kein Grund, eifersüchtig zu sein. Doch was haben eigentlich Jalousien damit zu tun? Foto: Marc de Roche

Liebi Läserinne, liebi Läser

Töif i mym Härz han i d Hoffnig gha, dass mir nach der Pandemie e chli dankbarer u zfriedener wärde. Leider isch es aber bi der Hoffnig blybe. I weiss nid, wis öich geit, wi dihr hüt öii Mitmönsche u d Umwäut erläbet? Wen i so umeluege, was momentan rund um d Schwyz passiert, verstan i nid, wi me «schaluus» uf angeri cha sy. Ja, dihr läset richtig: schaluus. Das isch es Wort, wo me hüttzutag nümm viu ghört. Es chunnt us em Französische – jaloux, jalouse – u meint so viu wi yversüchtig si. Mi dünkt, mir Schwyzerinne u Schwyzer heige ke Grund, uf wär ou immer, schaluus z sy. Im Grosse u Ganze hei mir doch di letschte zwöi Jahr – trotz gwüsse Yschränkige – ganz guet preschtiert. Im erschte Lockdown sy mer sogar aui no rächt fründlech u tolerant mitenang umgange. Aber plötzlech, nach es paar Wuche, hets mynes Erachtens kehrt. Klar, mir hei während es paar Monet uf Uslandreise, kulturelli Aagebot u fröhlechi Festivitäte müesse verzichte. Das hätt üs aber ou d Glägeheit gä, au das Schöne, wo isch blibe, z schetze u z gniesse. Stattdesse hei mir immer wider schaluus beobachtet, öbs de emänd angerne besser chönnti ga aus üs. Het nid grad geschter der Nachbar unerloubterwys Bsuech gha? Oder d Frou Hueber vo näbedrann het trotz verordnete Abstandsregle d Grossching goumet u ggärfelet. Ja, plötzlech isch d Solidarität verschwunde u me het schaluus uf d Mitmönsche gluegt. Der Chrieg ir Ukraine, u ds dermit verbungene Eländ für hunderttuusegi vo Lüt, het für mi aber no einisch e ganz angeri Dimension. I bewundere di Mönsche, wo dert vor Ort blybe, aber o aui die, wo sech jetz aus Flüchtlinge i mene frömde Land nöi müesse z rächt finge. Di Lüt hei aus zrügg gla u probiere jetz zämefüesslige i öppis Nöjis ine z gumpe. Das sy Schicksau, wo mi sehr aarüere u immer wider zeige, wi privilegiert mir ir Schwyz doch sy. U trotzdäm ghören i immer wider Stimme, wo meine, es syg e Zuemuetig, was me üs aus abverlangi. Ja, steu me sech vor, vilech müesse mer plötzlech wider Maske trage, d Häng desinfiziere, im Restaurant es Zertifikat vorlege … oder no schlimmer, chöi üsi Wohnig nümm uf 25° heize. Dihr merket, i däm Zämehang isch ds Wörtli «schaluus» sicher fäu am Platz. I wünschen üs aune e guete Herbscht u en Huufe gfröiti, dankbari u zfriedeni Momänte

Ursula Stalder-Witschi

Was hei Schalusie (Jalousien) mit Yversucht z tüe?
Schalusie sy ursprünglech Fänschtergitter gsy, wo zwar der Blick vo inne gägen usse hei ermüglechet, umgekehrt aber niemerem d Sicht vo usse gägen inne hei erloubt. Der Ursprung isch persisch. I de Harems het der Huusherr yversüchtig über sini Haremsdame gwachet, damit si vo niemerem hei chönne aagluegt wärde.

Weitere Artikel in der Kategorie Bern West

Weihnachtspost aus Bethlehem

Es ist wieder soweit: die Weihnachtsfiliale in Bethlehem öffnet ihre Tore. Dort stempeln Postangestellte die Weihnachtspost…